Gregory Widen

Gregory Widen (ok Greg Widen; * 30. November 1958 in Los Angeles County) is en US-amerikaanschen Dreihbookschriever, Speelbaas un Filmproduzent.

Widen weer noch Filmstudent an de UCLA as he dat Skript för den Film Highlander vun 1986 verköfft hett. De Film harr later groten weertschopplichen Spood.

Dree Johr lang hett Widen bi de Füerwehr arbeidt. In disse Tiet is he Tüüg worrn, as en Fründ bi en Rookgasexplosion (eng.: backdraft) ümkamen is. Dit Beleevnis hett em veel to doon geven un weer de Grundlaag för dat Dreihbook vun den Film Backdraft, de 1991 produzeert worrn is, wo dat üm en Drama ünner Füerwehrlüüd geiht. In den Film speelt he sülvst en lütte Nevenrull as Füerwehrmann.

Widens opstunns eenzige Speelfilm as Speelbaas is de Thriller The Prophecy vun 1995, de sik üm en övernatürlich Saken dreiht un in den Engels üm de Vörherrschap in’n Heven kämpt. To den Film hett he ok dat Dreihbook schreven. Disse Film weer 1996 för twee Saturn Award nomineert, ünner annern as Best Horrorfilm.